Unang Sweldo

Balik-tanaw mode muna ako ngayon. Bigla ko lang kasing naalala kanina na nahigitan ko na ang taon na nag-work ako sa abroad kaysa sa Pinas. More than 3 years lang ako sa Pinas while dito sa Dubai ay 5 years na & still counting. Tapos, biglang sumagi sa aking isipan kung ano ang ginawa ko sa aking mga unang sweldo.


Unang Sweldo sa Pinas

Akala ng iba, pag isa kang CPA at nagta-trabaho sa isang kumpanya sa Manila, automatic malaki na ang sweldo mo. Parang naririnig ko pa hanggang ngayon ang sinasabi ng mga kumare at kamag-anak namin sa nanay ko noon "mare, ang swerte mo kay tin. isang CPA, siya ang pag-aagawan ng mga kumpanya niyan." Sympre isang myth lng ang mga ito, ako pa rin ang nag-apply at lumapit sa mga kumpanya at tamang mabubuhay lang ang isang tao sa sweldo ko!

Ang biruan nga namin ng nanay ko pag kami na lang dalawa---hindi nila alam 'sabon' lng ang kaya kung i-contribute sa expenses namin sa bahay. Pero dahil super proud sa akin ang aking pamilya at mga kamag-anak noon ay talaga namang kahit ako feeling ko 'ang yaman ko!' at parang mataas na din ang sweldo. hahaha.. (big celebration nung pumasa ako sa board dahil 1st tym sa aming pamilya na nagkaroon ng CPA)

Isang kumpanya lang ang pinasukan ko sa Pinas, sa isang airline company. Feb 26, 2002 ako nag-start at akinse ng Marso ng matanggap ko ang pinakaunang sweldo ko! Sympre masayang-masaya ako. Alam kong inaabangan din sa amin ang aking unang sweldo. Ang dami kong gustong bilhin para sa kanila!

Noong panahon na iyon, eksakto namang nasira ang aming TV. Kaya sabi ko sa sarili ko, TV ang bibilhin ko para sa unang sweldo ko. I-susurprise ko si nanay para masaya. :-) Ang kaso, magkano ang color TV noon na 21 inches flat screen? mahigit 13,000! Kulang na kulang ang aking unang sweldo.

Pero dahil gustung-gusto kong maibigay ito sa amin, nag-text ako sa kuya ko na noon ay nagta-trabaho sa Taiwan. "kuya, pwedi mo ba akong pahiramin ng 10K? nasira na kasi yung lumang tv sa bahay, gusto kong bilhan sina nanay ng bago para sa 1st salary ko sana kaya lang di naman kasya. wag na nating ipaalam kay nanay ito, surprise ko kasi ito para sa unang sweldo ko" First tym kong nanghiram ng pera sa kuya ko nito. Hindi naman ako binigo ni kuya, ipinadala niya sa akin directly ang hiniram ko.

Pagka-weekend nun, inaya ko si nanay ko na magpunta kami sa SM. Sabi ko, kung pwedi sana magdala kami ng sasakyan dahil bibili kami ng TV! Sympre natuwa si madir at pinakiusapan ang isang tito na samahan kami. Ginagamit pa sa amin hanggang ngayon ang 'katas ng unang sweldo ko' - isang 21 inches JVC tv flat screen!

Nabayaran ko ang kuya ko after ng mga ilang payday pa... hehe...(may sariling pamilya na ang kuya ko noong panahon na iyon kaya nakakahiya ng humingi sa kanya)..hindi din nalaman sa amin ito. :-)



Unang Sweldo sa Dubai

On visit visa akong nagpunta dito sa Dubai. Walang employment offer, nakipagsapalaran lang kagaya ng aking mga kaibigan. 2 months ang validity ng visa noon tapos kelangan mo ng mag-exit. Nov 17, 2005 ako dumating dito. Jan 15, 2006 nag-exit ako sa Queshm Island, Iran.

Bago ako mag-exit ay eksaktong nagkaroon na ako ng trabaho (Dec 30, 2005). Pero bago ito, ilang baldeng luha ang niluha ko dito sa Dubai. Naikwento ko na rin dati dito sa blog ko na muntik na akong mapauwi ng Pinas dahil wala akong ginawa noon kundi ang umiyak. Ewan ko ba, masyadong madrama ang buhay ko noon. Sabi ko nga lahat na yata ng occassion iniyakan ko noon (christmas, new year, valentines, bday, fiesta etc....)...hahaha.

Dahil nasa abroad na ako, door-to-door money transfer ang pinakaunang padala ko sa nanay ko! Nangyari ito noong araw na nag-exit ako. Hindi ko pa na-received noon ang unang sweldo ko dahil month-end ang payday dito. Pero since confirmed na na may work na ako, excited ko ng ipinadala sa pinas ang natira sa allowance ko tsaka yung ilang days na bayad sa akin sa nauna kong pinasukan bago ang unang kumpanyang nag-visa (employment) sa akin.

Madami din akong nagastos sa pagpunta dito. At ang mga naging financer ko noon ay ang aking kuya, si tita MG at tito OB. Hati-hati sila. Very thankful ako sa kanila dahil sila pa mismo ang nag-alok ng tulong sa akin. Samantalang walang kasiguraduhan kung makakahanap ba ako ng trabaho dito. Kaya naman ang mga unang sweldo ko ay inilaan ko agad sa pagbabayad ng aking mga iniwang obligasyon sa Pinas.