Mahilig akong magbasa ng romance pocketbook dati. First year highschool ako nun nang ipakilala ito sa akin ni BC, isang kaibigan ng kaibigan ko sa baryo namin. Nagkainteres agad ako sa pagbasa ng mga istorya ng pag-ibig. Madalas kinikilig pa ako habang nagbabasa ng mga ito. Timing naman, merong rentahan ng pocketbook malapit sa iskul namin at naging suki ako dun. Paborito ko noon ang Valentine Romance. :-)
After highschool, sa Maynila na ako nag-aral. Akala ko noon matatapos na ang aking pagka-adik sa pocketbook. Nagkamali ako, mas naging adik pa ako. Nadiskubre kong meron pa-rentahan na naman ng pocketbook malapit sa aming boarding house at iskul. Pwedi mo itong isoli after 3 days basta ibibigay mo lang sa kanila ang registration card mo. Merong time na kinuha ko lang registration card ko dahil tapos na ang semester.hehe. Natatawa tuloy ako ngayon. Ganun pala talaga ako ka-adik nun. Naging paborito ko naman ang Precious Hearts Romance. :-) Hindi ako nagsasawang magbasa noon. Kahit nasaan ako- sa iskul, sa boarding house, sa dyip, sa bus at maski sa bahay namin sa probinsya. Mabilis lang akong makatapos ng isang tagalog pocketbook- matagal na ang dalawang oras. Kaya pag meron akong time, nakakadami talaga ako ng pocketbook na puro mga kwento ng pag-ibig. Tapos, 2nd year college ng maging close kami ng bestfriend kong si MC. Isa din siyang certified adik! Meron siyang sariling pa-rentahan ng pocketbook sa kanilang bahay sa Navotas. Dito na ako mas lalong na-adik. Ibang level na ito, naging tagasubaybay naman ako ng mga series na pocketbook. Bawat isang series merong humigit-kumulang na 25 pocketbooks dito. Nakarami din ako ng series, pero ang naging all time favorite namin ng aking kaibigan ay ang Kristine Series. Natapos namin ang series na ito, fourth year college na kami! Sa mga panahon na ito, nagsimula din akong magbasa ng mga English pocketbook kagaya ng Mills & Boon at Harlequin Romance.Hanggang sa dumating ang time na parang alam ko na agad ang mangyayari sa istorya. Siguro sa sobrang daming istorya na nabasa ko, parang ang tingin ko ay magkakapareho na sila. Bago pa ako gumaradweyt sa college ay nauna na ang pag-gradwyet ko sa pagbabasa ng pocketbook.
Napadami yata ang aking introduction. Gusto ko lang ipaalam sa inyo kung gaano na kadami ang aking mga nabasang kwento ng pag-ibig. Pero ang susunod ninyong matutunghayan ay mga totoong kwento ng pag-ibig na nagbibigay inspirasyon sa akin para maniwala pa rin sa pag-ibig.
Lovers in Friendster
Nakilala ko si CF dito sa Dubai nung Dec 2005. Siya ang nag-train sa akin sa unang kumpanya kong pinasukan dito sa Dubai. Ako sana ang pansamantalang papalit sa kanya habang siya ay naka-maternity leave. Saglit lang ang aming pagsasama dahil after a month ay nag-decide akong lumipat sa ibang kumpanya habang hindi pa nila ako nabibigyan ng visa. Sa maiksing pagsasama namin ay nabuo ang isang matagalang pagkakaibigan. Naikwento niya ang simula ng istorya ng pagmamahalan nila ng kanyang asawang si MF.
Si CF at MF ay magka-schoolmate nung highschool. Magkakilala sila sa mukha pero never silang nagkausap man lang. Though sabi ni CF, medyo crush na niya dati pa si MF :-). Nagkahiwalay sila ng landas after highschool. Naging busy sa college at pagkatapos sa kani-kanilang mga career. Dahil may ate si CF dito sa Dubai, nag-decide siyang subukan ding magtrabaho dito. Fyi, si CF ay NBSB (no boyfriend since birth) sa mga panahong ito. Wala siyang kaalam-alam na mababago ang buhay niya ng isang message sa Friendster.
Samantala, si MF ay isa nang ganap na inhinyero at ang isang kagaya niya ay in-demand noon sa UAE. Kaya naman hindi niya hinayaang mawala ang malaking oportunidad. Nadestino siya sa Abu Dhabi (humigit kumulang dalawang oras ang layo sa Dubai). Nang maging maayos ang lahat kay MF ay sinubukan niyang magkaroon ng contact sa kanyang one great love. Hindi siya mahilig sa mga social networking pero sumali pa rin siya sa Friendster at nagbakasakaling doon siya makakuha ng impormasyon kay CF. Tama ang kanyang kutob. Nakita niya sa Friendster si CF at laking tuwa niya ng makita ang impormasyon na nasa UAE din pala ito. Kahit may pagkamahiyain, naglakas-loob siyang mag-send ng message kay CF.
Palibhasa busy si CF sa madaming bagay, hindi niya regular nabubuksan ang kanyang Friendster . Minsan, pagkauwi niya galing sa ofis sinabihan siya ng kanyang kapatid na meron nag-message sa kanya sa Friendster at itinatanong kung kakilala ba niya si CF. Na-curious si CF kung sino ang naghahanap sa kanya so dali-dali niyang binuksan ang kanyang account sa Friendster at dun na niya nakita na meron palang mga messages si MF na two weeks old na.
Doon na nagsimula ang walang hanggang pagmamahalan nina CF at MF. Ilang taon ang lumipas mula noon, sila ay nagpakasal at nabiyayaan ng isang magandang supling na si baby HF. Ngayon ay nasa Canada na sila, masaya at magkakasamang namumuhay doon.
Lagi kong naalala ang kanilang istorya tuwing nag-memessage sa akin si CF sa Friendster. Natutuwa ako at kinikilig pa din. Sinasabi ko din kay CF na isa sila sa mga inspirasyon ko pagdating sa buhay pag-ibig. Ang Nasa Itaas kasi ang sentro ng kanilang pag-iibigan. Sa kanila ko din napatunayan na True love waits. :-)
Untitled Love
Si Maria (hindi tunay na pangalan) ay isa sa mga matalik kong kaibigan. Siya ay likas na may pagkabusilak ang puso. Hindi matatawaran ang kanyang pagmamahal at pag-intindi sa lahat ng mga taong nakapalibot sa kanya. Kayang-kaya niyang ipaglaban ang mga taong mahal niya.
Hindi nakapagtatakang madami ang umaaligid sa kanya para lang sila ang piliin nito. Nagmahal siya sa unang pagkakataon. Naging maligaya siya sa kanyang unang pag-ibig ngunit ito din pala ang magdudulot sa kanya para maranasan ang sakit at hapdi ng isang nagmamahal.
Nawalan na siyang ganang magmahal ulit. Ayaw na niya kasing masaktan ulit. Nagbago ang kanyang pananaw sa pag-ibig. Ayaw na din niyang mahulog ang loob kahit kaninuman.
Si Romeo (hindi tunay na pangalan) ay kaibigan ni Maria mula pa noong college days nila. Isa din siya sa mga nakilala kong sobrang bait. Kung tutuusin bagay na bagay talaga sila ni Maria. Though may nararamdaman na siya kay Maria ay pinili niyang manahimik at maging masaya na lang para sa kaibigan. Pinilit niyang maging mabuting kaibigan dito. Lagi lang siyang nandoon para kay Maria.
Nang masawi sa pag-ibig si Maria ay nasaktan din si Romeo para sa kaibigan. Ipinangako niya sa sarili na hinding-hindi niya hahayaang masaktan si Maria. Wala mang lakas ng loob para masabi ang nararamdaman, idinaan niya ito sa gawa. Naging visible siya sa lahat ng pinupuntahan ng kaibigan. Nakipagkaibigan sa mga kaibigan nito. Pati sa pamilya ni Maria ay nakipaglapit ito.
Sa pagdaan ng panahon, si Maria ay nakarekober na. Wala na siyang nararamdamang sakit. Pero wala pa rin siyang balak umibig ulit. Kuntento na siyang meron siyang mga kaibigang nagmamahal sa kanya kasama na si Romeo.
Dahil laging magkasama ang dalawa, hindi tuloy maiwasan na tuksuhin silang dalawa. Syempre si Maria ay todo tanggi-magkaibigan lang daw talaga sila at hanggang doon na lang. Hindi niya namamalayang nasasaktan na ang kaibigan dahil meron pala itong itinatagong damdamin sa kanya.
Hanggang sa dumating ang araw na hinahanap hanap na ni Maria si Romeo. Para bang hindi kumpleto ang araw niya pag hindi niya ito nasisilayan. Na-realize ni Maria, inlab na siya kay Romeo. Hindi niya pinilit at sinadya ngunit nangyari.
Ang pag-iibigan ng dalawa ay naging ehemplo naming magkakaibigan. Mula pa noon ay alam na naming magiging masaya sila sa isa't isa. Kampante kami na ang natutunang mahalin ni Maria ay si Romeo na lubos ang pagmamahal sa kanya. :-)
No comments:
Post a Comment