Sa Kabila Ng Lahat

Hindi ko maiwasang malungkot tuwing nakatutok sa aming telebisyon dito sa ibayong dagat.
Wala man ako sa sariling bayan ngayon ay 24/7 kong nalalaman at inaalam ang kondisyon ng aking pamilya at kababayan. Ramdam ko ang paghihirap ng ating mga kababayan. Ako ay dumadalangin na sana matapos na ang krisis na ating pinagdadaanan.
Hindi pa nga tayo nakakarekober sa hagupit ng bagyong Ondoy ay dumating na si bagyong Pepeng. Nawa'y bigyan pa tayo ng dagdag na lakas at katapangan para malagpasan natin ang mga pagsubok na ito.
Sa mga panahong ding ito, hindi din matatawaran ang pagsuporta ng bawat Pilipino saan mang bahagi ng mundo. Madami tayong mga kababayan ang lubos at buong pusong tumutulong sa ating mga kababayang apektado. Ako ay nakikiisa sa kanilang mga mabubuting adhikain.
Sa huli, ako ay positibo na muli tayong makakabangon at makakabawi. Hindi tayo pababayaan ng Nasa Itaas. Maniwala tayo.